金融科技周天价早餐 沙嗲牛麵菠萝油要呢个数 网民讽「才俊价」︱Ray Online

今年香港金融科技周(Hong Kong FinTech Week)昨日（28日）起一连5日在亚博馆举行，预计吸引超过35,000名参会者、逾800位世界级演讲嘉宾及700间参展商参与，除了是迄今规模最大的一届，场馆内的餐饮「天价」更引起网民关注，似乎只有一众「金融才俊」先食得起。

现场餐牌可见，一份早餐价格由120蚊至170蚊不等，最「平」的120蚊3号餐有鱼蓉肉碎粥、油条，以及猪肠粉，连一杯奶茶或咖啡(冻饮另加5蚊)。至于1号餐沙嗲牛肉麵配菠萝油，连一杯奶茶或咖啡，就盛惠125蚊，旁边仲有括号标明写住用大光麵。至于最贵的4号餐有鲜火龙果粒、水果乳酪配烤南瓜甜椒薄饼卷，盛惠170蚊。对比「天价」早餐，午餐价钱相对「抵食」，由125蚊至190蚊不等。190蚊最贵两个餐，分别係芝士烟肉焗细新薯配烤猪排骨，同埋蟹肉金菇伊麵配炸鸡翼加杨枝甘露。

至于全日供应餐牌有忌廉鲜吞拿鱼酸瓜菜沙律三文治，盛惠170蚊，美式热狗亦要60蚊，全场最平係迷你鬆饼同500ml支装水係最平，分别30蚊埋单。

网民对此热议，有人认为「咁小气，百几蚊个早餐，冻饮仲要加钱」，亦有人认为「其实都过百蚊，我觉得冻饮真係唔洗加$5咁少，可以进取啲」、「睇完早餐觉得午餐算合理」、「其实不嬲呢啲会塲全世界都咁贵㗎啦，又冇人迫你食，做乜好似发现新大陆咁」。

亦有人指「劏客之都」、「金融才俊价」、「大光麵要加个括号，唔识以为係好嘢」、「去得fintech嘅，个个都係金融才俊，又点会志在百几蚊一碗大光麵呀？求其0.001个bitcoin都唔止呢个价啦！」、「搭返车去东涌食」、「贵係正常，预你出公数」、「话哂係金融界，呢个价係值得拥有嘅」、「伦敦茶记都冇咁贵」，另有人提及海皇粥店推10蚊放题，指两件事实「相映成趣」。

原文刊登于 AM730 https://www.am730.com.hk/本地/金融科技周天价早餐-沙嗲牛麵菠萝油要呢个数-网民讽-才俊价-ray-online/501460?utm_source=yahoorss&utm_medium=referral